三歲生日

雪雪~

快快樂樂
健健康康
古古惑惑
圓圓碌碌

隨緣

第一次見面時已發現左邊有一個摺...心裡不其然又再一個突!
接下來每次也巧妙地不讓我再看見! 雖然我好想知, 但不想刻意去尋根...隨緣吧!
今晚終於見到, 真的崩了!!!


還有待證實! 請保守秘密~

西貢燒烤

星期日晨早六點幾就比虫虫攪醒...訓得兩粒幾鐘乍我! 十半就出到旺角會合舵主同契媽媽地...準備好勁重裝備去西貢野外燒烤, 係我地燒住野食比個太陽烤! 真係熱到野都無胃口食(我啫) >.<

我同虫虫都一致覺得自助BBQ場啱我地呢d懶人多d, 效外的太多野要準備, 又多蟻, 食食下又會空降條虫落黎...依呀~ 除左春虫虫...我係吾會鍾意第二d虫架 ^0^

乾煎到四點先散場, 再去西貢買好味o既包包同ham, 然後在建議下途經"將軍澳"行東隧返西環洗白白! 一輪大洗後真係c服晒~~

開始覺得攰喇, 但都同虫虫過金魚街睇下犬買下魚魚食下八方雲集 (雖然台灣果間好味d, 但呢間都吾錯喎) , 再去花墟買埋花花就打到回谷喇！十二點先返到谷…再攪呢樣攪果樣成三點先訓！第二朝起身整愛心早餐比虫虫果時先黎料...甩手甩腳好似打完五場波行左三個山咁！
我呢個打壞又要灘抖返兩日儲下氣先喇 ^^

《驚》喜星期五

今朝一早比犬吠聲噪醒後就起身整芝蛋治比虫虫拎返公司食! 犬吠聲仲係不斷...

到虫虫要出門口之際...一開門哇左一聲, 居然失驚無神有隻toy poodle行左入我地屋呀! 我又哇虫虫又哇哇~~ 隻poodle可能都比我地哇親就行返出門口樹望住我地, 而我當時都有d怒氣架...心諗點解會有人(樓上樓下都係新搬來的) 放d犬自己係條樓梯到行架! 痴根! 嚇親人加麻, 賴尿落我地d鞋到咁點算呀?!

跟住虫虫又要趕住出門口喎, 我就唯有開門護駕啦, 見個小朋友都幾乖幾得意, 仲好似想叫我落樓搵d乜咁喎, 點知落到一半...又見到一大隻金毛扒左o係下面, 而下面單位隻門又開左喎?!! 望入去又影都無隻, 房門就關左, 大聲嗌拍門又無人應, 望入屋又見到有鎖匙放在枱面, 門口佢地架車又仲係到, 而隻金毛就扮 (點計用個扮字? 繼續睇落去就知架喇) 守住個屋企門口, poodle就走上黎搵人求救 =.= 心想咁o既情況...吾係有人出左事下麻 ⊙_⊙

當時虫虫又趕住趕尾班村巴, 我就唯有獨力睇下咩情況啦! 我又吾敢入佢屋...驚見到d吾應該見到又一世難忘o既野喎, 點好呢?? 於是乎我行返上樓打比老鍾, 點知佢又去左游早水無開電話, 點好呢??
然後就聽到樓上個賓賓同個少主o係到大嗌 =0= 我咪又衝出去睇下羅! 噢...原來係隻poodle又案件重演一次......

不過有分別就係個少主自己行左落樓下開左鐵閘在街外齋睇住個賓賓好驚咁吾敢行落樓, 仲要bilibala孟話自己趕時間呢樣果樣那樣! 因為個鐵閘比樓上個少主開住, 眼見隻poodle行埋出街都吾理 (啦星丫), 我就開始緊張怕個小朋友會走失, 拿拿淋口快快咁叫住 "BB" 快d返入黎啦, 佢又真係好乖咁行返入黎喎! So Q~

跟住我就開路比個賓賓出去倒垃圾, 再等個賓賓返入來我再關好鐵閘, 確認佢吾會再開鐵閘令d犬走左出街流浪, 之後我就再返上樓搵老鍾......

再開門落去望下隻金毛, 又係原封不動氣定神閒咁坐係佢家門口, 而隻poodle仔就好得意咁不停跟住我, 又表演patpat坐地雙手遞起勁可愛咁喎! 仲想跟我入屋玩添, 不過我眼尾啤到阿雪雪好驚咁搵訂呢緊, 所以我就無比隻犬入屋...而佢就好乖咁o係我家門地毯到灘C!

關門後, 阿雪雪已經失去踪影了~~ 搵暈全屋佢平時呢埋o既地方都搵吾到佢, 打開個招雪雪櫃再用尤魚絲引都吾蒲頭(平時九秒九衝住跑過黎架)! 搵左成個字, 終於發現佢娟左入個低音喇叭後再用另一個喇叭set左自己碌架 -__-! 見佢縮埋自己一個波咁塞左係入面吾出吾入吾前吾後好驚驚咁! 我就即刻搬開d喇叭救阿雪雪出黎, 攬住佢呵返佢先! 個樣好可憐咁...可愛到不得了~~~

原來虫虫話今朝起身已經見到阿雪雪慌失失架喇...陰公!!
不過我R爆頭都諗吾到佢點可以娟到入果到, 個入口位只有三隻手指咁濶...以雪雪今時今日盡得我真傳o既身型^^ 根本塞吾入去!! 真係一個迷!!

幾經辛苦搵到老鍾, 知道樓下屋主個手提飛左去留言, 有d驚添~~~ 吾通真係出左事?! 報吾報警好呢?
再過左十五分鐘左右, 老鍾已經飛車趕達, 佢係屋外拍房窗無人應...跟住就同我講: 真係訓得咁淋o既? 咁都吾醒o既! (我即時有d心跳加促) 之後佢就行入屋大力拍房門, 都無人應但房門是鎖住的! 而我就繼續企o係門口怕見到d吾應該見到o既野 =_=!

等我交待一下上文點解話隻金毛係扮守門口先, 事關佢到呢時呢刻都仲係原封不動咁坐o係門口吾吠吾郁懶得理你出出入入拍門大叫! 死未?!

拍左好耐都無人應, 我睇見放在廳的鎖匙應該有房門匙(因為我都用過呢種門鎖), 但我地兩個都吾敢拎去試...!
跟住我就問老鍾咁洗洗報警? 咁情況都吾醒就真係吾會醒架喇喎!! 佢答我: 佢都吾知...! 我就再問佢o係窗外係咪真係見到有人o係房入面? 佢先答我...佢見吾到! 我頂⊙_⊙ 嚇得我丫頭先!!

於是我叫佢再試下打比屋主, 終於有人接電話喇~~
呼~ 虛驚一場!!!!!

最後我就同"BB"(我比poodle的稱呼)講: 搵到你主人喇...返入屋到等啦好吾好? 再叫埋隻睇得吾打得o既金毛入返屋關埋佢地隻門就上返自己屋企, 入到屋又發現阿雪雪呢左入頭先個位到 -__-!

驚《喜》星期五

攪左成朝...醒晒!! 睇返個市, 又跌成八百...無眼睇! 攬住粒受驚嚇疑神疑鬼o既雪雪訓返陣先! 叫虫虫下晝開市再叫醒我, 好快我地就一齊著晒Zzzzz

訓到濛濛瀧瀧之際收到個電話...
個女人話: CH小姐呀, 我係花店架, 依家o係市中心搭乜車可以去到你到呀? 搭960A得得呀?
我都仲發緊夢...隨口up左架巴士號碼就收左佢線繼續訓! 再過左吾知幾耐...
個女人又打黎: CH小姐呀, 我又係花店呀, 我依家o係邊到邊到個公廁呀...我點去你到呀? 你呢到真係好難搵呀!
我此時先回魂問: 下? 你打幾號電話你搵邊位呀? 送乜花黎呀? (其實我都未醒晒...個腦仲諗緊我都無叫到蒸漏水...點計有人送貨黎架?!)
個女人就答: 903乜乜乜搵CH小姐羅...地址係乜乜乜丫麻! 我送花黎架, 不過邊個送我真係吾知喎...
=.=! 成朝o既突如奇來令我R爆頭, 不過比起今朝呢d只不過係小兒科啦! 送到黎睇左乜料先再算啦!
十分鐘後又收到花店小姐個電話: 我搵到你個門牌信箱喇...但係我點入黎呀?
唉...呢位花店小姐都真係十下十下, 再加上那個策劃人又蠢下蠢下! 令到原本應有o既驚喜...變左好似我自己訂左花叫人送貨比自己咁 -__-! 死未?!

一見到札花 (顏色同花店地址)...我已經確定誰是策劃人喇! 就算你吾認...哼! 但你實在係太多破綻喇! 呵~

多謝你特別...蠢...的策劃 ⊙0⊙
多謝你特別...sweet...的花花 ~3~

休養期

好耐都無新卜, 事原係個市太波濤凶擁...而我已身在洋澄湖的就比較平平淡淡! 一句講晒就係懶喇^^

雖然同虫虫久久都有炒下飯, 但都係家常便飯, 訓醒覺又無事果隻!
比較特別的只有係九月尾舵主的正日生日, 買埋帝苑蛋糕加份出古惑手機, 一行八人去了太古城食路比星期二, 其實我想講最特別的係我無遲到! 同虫虫係最早到的兩個 =.= 係咪好特別呢 ^0^

呢輪同虫虫都經常晚晚煑飯仔(吾係炒飯仔), 我又懶勁咁每朝爬起身整埋愛心早餐比虫虫帶返公司食, 所以虫虫近來肥左又靚左喎!
嘻~ 通常話人肥左都要讚埋靚左先吾會比人打架! 係咪呀?

這個中秋不快樂

九月十四日

今年係我記憶中最吾開心的一個八月十五...

零晨已經因為你o既吾體諒而炒飯, 到起身又因為種種再炒過! 各有各立場...心知無話誰對誰錯!

一早已經向外舉左紅牌...一來真係決心戒酒吾同d魔鬼出去襯, 二來覺得中秋節都應該係同所愛o既人曬下月光至! 但奈何車左你過銅鑼灣之後, 遊魂野鬼o既心情再加上周遭o既氣氛, 又無奈地賴低左衰衰! 令灰透的曳曳變得更深! 吾想...但始終都係忍吾到咁......
估吾到咁啱兩年中秋都係食咖喱! 而今年我覺得係哽咖喱, 明明食飽都要陪我食兩啖令我更難受你知道嗎? 吾想...但始終又係忍吾到咁......
深灰因為兩粒雪米糍有些生機! 但一到達聖士堤反灣遇上黑雲, 泊車之際驚覺左面有數滴水迎面而來已心知不妙! 亦錯愕你的即時反應係拎張紙去抹支穿左o既瑩光棒而吾係抹我面上的瑩光劑!!! 一泊好架車定一定神先覺得左眼好乸, 立即落車攞支水沖眼, 已感覺到左眼開始腫但視力還可以, 以你當時的手足無躁...我堅決自己死頂揸車去瑪麗! 免得途中再發生事故...越幫越忙!

護士拎張長條post-it型但硬十倍o既紙放入我下眼皮內驗pH...有九度! 要幫我用生理鹽水沖眼, 可能兩眼係相通的關係, 沖沖下連右眼角都乸埋! 再驗pH...兩隻眼都要沖! 沖左三大包之後再驗係八度...見醫生...話要再沖眼 =.=
護士係咁要我撑大d隻眼沖, 佢怕佢用手幫我撐會整痛我喎! 我話已經努力但我做吾到...試問比條水射入隻痛眼到的本能反應又點會撐得大呢?! 佢話佢都知...亦開始不停氹我安撫我-__-
雙眼已經比鹽水沖到乾晒! 每驗一次pH就等同比刀片落隻眼到一樣! 再沖水就等如在傷口上曬鹽一樣!
好辛苦好想放棄吾再沖, 但佢話吾沖到七度係吾可以比我走的! 如是者沖多左七、八包鹽水左十幾次...終於都去到七度! 我終於都可以離開刑場喇(開心得黎又腳軟), 行出刑場...半件衫比水整濕左, 個頭又痛到爆, 雙眼又乾又乸又漲! 得返半條人命, 見到虫虫...一放鬆個人就崩潰了......
我頂丫! 家下先黎有眼淚...頭先有就吾洗乾曾曾咁硬啦!
再見多次醫生, 攞埋封眼科轉介信再去攞藥就可以走喇! 返到西環已經係零晨三點幾喇, 立即沖涼洗頭食d野滴埋眼水食埋藥就上床, 諗返起今日無見過月光無團個圓, 無樂過就只有悲! 又一次吾想...但又忍吾住......

＊＊＊

九月十五日

訓下醒下滴下眼水fu下冰, 同虫虫訓到四點先起身整野食d野再車虫虫去紅磡, 因為今晚虫虫要去大酒店。
而我就家庭樂, 但自己真係樂吾出又要扮樂! 隻眼受傷吾舒服都死忍吾講, 因為早個星期已經因為打壁球左腳抝柴受傷都未好, 今次受傷位置同十年前受傷跛左"兩年"的位置只差一寸! 如果又知我整親隻做左lasik 吾夠兩年o既眼就實比人鵝死都似! 個人已經夠煩...吾講可以清靜d就隱瞞把喇!

＊＊＊

九月十六日

由於尋日係假期關係, 今日先有得睇眼科!
虫虫個同事放假所以不能請假陪我去睇醫生 >.<
眼角吾舒服好似谷住谷住咁, 有d擔心...四點就起左身眼光光訓吾著, 一早去到醫院又要眼驗pH...又8.5!!! 救命呀~~~ 又要十大酷刑~~~
晨早流流雙眼已經乾, 沖到第二包鹽水我已經支持吾住喊住咁沖! 個護士一邊沖一邊安撫我...但佢話除左沖水去稀釋就無其他方法幫到我! o係果一刻o既心情...只有自己先會知...
終於沖到7.5度見醫生, check 左無傷到角膜, 又無傷到做過lasik o既位置, 都應該無乜大礙喎! 繼續滴下眼藥水, 下星期再覆診!


腳又痛眼又痛都不特止, 今日仲肉痛添! 全市大震直插...睇黎都有排要o係洋澄湖養傷喇我!!!

搶閘出世

晨早八點幾比個SMS噪醒=.=
得知細佬B在零晨0447搶閘出世趕住睇奧運?! 早過預產期成四星期...都有六磅幾^0^ 算係咁啦~
一知道細佬B今日搶閘...我第一個想到的就是《一個約定》...有待證實...

希望細佬B健康成長~

遙遠的祝福

心肝寶貝~

生辰快樂!
願您倆在何地也健康幸福快樂!

永遠愛您倆的媽媽上

戒酒

我在此立誓戒酒!
任何人士如發現我有所動搖...請提醒我鬧醒我!

偷窺

早兩日偶然從十妹口中發現有人對我屋企出人既人都撩如止掌-__-!
一直摸不著頭腦R爆頭! 今朝竟然被我發現原來一直比C9仔隊偷窺住! 被人暗中偷窺既感覺真係好恐怖!!! 好彩果個位淨係望到我屋企個大門口, 吾好彩既就係我知得太遲...條C9剛剛搬走左! 如果吾係我一定掛個"八卦" o係門口...等佢每日都可以望埋自己有幾咁"八卦"! 它佢媽的x@$#&Y!

一個半週年

今年變左係大家減肥成功!!! 吾係一個半週年快樂喎! 因為...我地已經覺得好快樂喇~

dodo現身~ 我相信你吾多吾少都估倒係d乜啦! 我都吾多吾少估到你的反應啦...仲有一次機會喎?!

赫德道8A三十八樓屎weet海景燭光晚餐~
本來虫虫打算可以一路食飯一路睇《幻彩fing啷啷》的...但因為要搵地方安置好史迪仔巴士所以只能睇《彩光耀窄港》~
呢間餐廳既玻璃鏡位design得好特別! 本來應該係浪漫爆的(因為真係暗得黎又吾多人)...如果無附近個街市婆的話! 不過呢到都值得推介的, 因為不單止是食《氣氛》...連《服務》、《味覺感官》都食埋! 抵~ 而且絕對係滿足到我呢個包怪同你呢個菇怪添:P
呢到果然係lum女聖地! 今晚望住你都覺得你零舍靚~

溫馨完就返西環做送貨仔, 之後我地就返谷脷疊脷! 嘩~ D《脷胎》真係正到呢~~~
吾好誤會...我地吾係打車輪而係食海膽啫~


期待有記憶的兩週年~3~

緝毒

零晨四點~

右手食指同指公都好很痛 >.< 事緣接完老闆返谷之後就開始緝毒~~ (幫手執野...其實係想摷手信) 第一時間拆開個 dodo 目及下先...呢個dodo跟我原先想買的有出入! 開始頭痕中......!! (轉頭再講)
繼而要先拆箱雪好d空運到港既海產先...正~
跟住再豆一豆那三個總值$1140大元的頂級超細T嘜蜜瓜 (虫虫的極力推介) ...得35b乍...滴晒汗 -_-!
都吾明人在外地係咪會豪d架呢? 定係老闆high左草(黛衣草)?! 瓖金既海產同蜜瓜...我相信o係香港...老闆打死都吾會買比我食架 =.= (就連我自己都吾會捨得買...我都好慳家架^^)

除左食, 我真真正正既手信原來係盒"炭"...比我放o係車燒既炭~ 呀吾係...應該係吸味既炭! 不過我想問老闆...可可以折現呀? 幾百蚊買盒炭用黎放o係車吸味?! 叫虫虫放少d屁就得啦.........

其餘所有都檢查完畢之後, 我就沖乾淨涼上床望住個 dodo 繼續頭痕...無情情多左件配件! 裝上去又好似靚好多咁...但又吾知點裝喎! 老闆又話琴琴青趕住買...無問過點裝喎! 我上網摷又摷吾到...唯有自己發掘下啦!
依~ 好似可以慢慢退出來喎...不過好實...用左五分鐘先可退出! 不過原來退出左都係焊死的 -_- 拆吾開! 無計可施下就唯有還原啦...吾用配件都無計! 點知...仆街喇!!!!! 塞吾返入去呀! 下? 咁聽日點算好呀! 如是者...我就由坐o係床到唉o係床到o訓係床...係咁塞呀塞塞呀塞...塞左粒幾鐘先塞得返入去...嗚嗚嗚...我兩隻手指頭好痛痛呀 >_< 你聽日好呵返我呀虫虫~

喜怒哀樂

《喜》
今晚...老闆返黎喇! 成個禮拜...我同阿雪雪都好好好掛住老闆...D手信 ^0^
(生女丫生女丫...生舊叉燒好過啦)
係佢臨出發前千叮萬噣比我煩爆要佢幫我買既 dodo 終於都浦頭喇~ 好緊張呀~

《怒》
滙豐就有個日夜理財中心
寒風就有個日夜炒飯中心

《哀》
我的預算與期盼終於都係幻滅告終! 十二萬分既無奈與無癮!
一次又一次感覺到不協調...怎辦?! 又可以怎辦?!

《樂》
等左三個月有多! 上星期六終於都收到考試成績喇...大步過...抹一額汗 ^^

灰......

八號風球

六月二四日

送別虫虫表哥返袋鼠國之後就同舵主地食住家飯! 食食下就得知將會在十一時前掛八號風球, 所以一食完坐左陣...我地就比舵主趕走喇 (話驚我地山長水又遠大風揸車危險喎)! 不過我地沿途返去都無雨喎, 開個車窗睇下d風大大先...都大大地啦不過係熱風黎o幾...明符其實的《熱》帶氣漩!
本來虫虫今日應承同我夜晚去飲下野架! 不過佢縮沙呀...話不如返屋企一路飲酒一路睇電視喎 >.< 哼~ 呃鬼人!

＊＊＊

六月二五日

六點就醒左睇下打完八號未先! 諗住未打完就可以叫虫虫繼續交豬吾洗返工, 點知原來無得訓果個係我 >_<
不停扎醒睇下落波未...到落返三號之後就要出動史迪仔刀疤士去《派餅仔》, 其實咁樣打風都真係無乜著數...至少對我黎講係! 要返工o既都好似仲辛苦左去趕車塞車添! 不過話時話都好似未試過同一個月份內又黑雨又八號喎...吾通真係.........

今日得番半日市, 又係檀花一現升完又跌! 應左虫虫話事齋： 得半日市咪益左你....跌少半日-__-! 真係多晒喎~~~

約左衰衰今日打《乳無求》, 其實我地係想虫虫打波之前跳番part《求乳舞》先, 希望佢夢想成真! 所以三條友去元朗食完 "田中" 就早左成半粒鐘去到攞場! 打左一個鐘啫, 成個人臭晒, 之後仲手震腳痛添! 好彩我無乜接虫虫d《無定向風球》乍, 如果吾係可能成身散晒有排執都似!
等我o的起心肝做返多d運動先! 實行減肥去作反:P

後記~ 打羽毛球吾止係手腳痛...原來成個patpat都會痛架 >.<

無言

昨晚的來電...
被你看見的我...
令你擔心...對不起!

夜難眠、口無言!
有你擁著我睡...令暴亂的細胞稍為舒援...我愛您!

樂極生悲

六月二二日

有人食飽飯飯返到屋企煲住碟食古力樂雪條, 佢食完之後我就好心比張濕紙巾佢抹下個黐立立o既咀啦 (慎防d人未抹咀就雷落我到), 點知d人抹完個咀就張張紙巾放左係側邊張枱到繼續煲碟, 咁煲完我咪拎起舊紙諗住揼左佢羅! 點知一攞起...有人就望住我隻手指大笑! 我一望...頂! 有舊鼻屎high左落我隻食指到呀-__-! 即時斜睥條笑到標晒眼水的死虫虫, 諗住張粒鼻屎塞返落佢個笑到合吾埋o既口到啦, 但失手! 我見事敗就拿拿聲去廁所洗手啦, 而虫虫就笑到cut住咁行入房攞衫沖涼, 說時遲那時快, 虫虫衝入黎廁所, 原來佢卓琳仔上身呀......玩到<嘔>呀! 虫虫嘔返d古古力雪條出黎不特止, 仲要係由床到廁所沿途都係 -__-! 好似賴屎屎咁好核突呀! 唉...之後就梗係大工程啦我 >_<
哼! 我以後都吾同你玩鼻屎呀...屎虫!


討厭今晚聽朝今晚聽朝今晚聽朝!! 不過...總掣已關...無機會再跳線了!

＊＊＊

六月二三日

尋晚有人嘔到張床肉都係, 用水抹完仲要開行冷氣加風扇狂吹成粒鐘先可以鋪床單! 就係咁, 有人就吹到病埋發燒燒返吾到工添! 唉! 玩鼻屎玩到咁你都算係經典呀~~~


我今日已經好無心情架啦, 點知去食飯泊低架車, 食完就去左超市入下貨, 到攞返架車果陣就發現比人high花左個右車尾! 仲要係深到入晒肉果隻 >.<
自己又或者虫虫high花都心甘命抵丫! 比人撞完走埋就真係忟爆 .\¥/.
點解我頭頭碰著黑架!!!!! 幾時先可以比返d光明我呀??!!

酒色財氣

時間緊迫的關係, 612同你父親食飯, 614同我父親食飯, 由於615係父親節o既關係...我地各自各精彩! 為o既又並不是各自的父親喎...好難明哩? 正確d黎講係因為虫虫要返西環村吾理我 >.< 我就唯有免為其難咁去作反啦^^

＊＊＊

六月十六日

尋晚作反過度...深夜三點半被虫虫追蹤:P

今晚等虫虫放工去左黃金食飯, 跟住去左睇Sex and the city, 煲淨season5同6都等吾切要睇左先! 正~

轉移陣地青山灣烈火戰車, 乜得虫虫咁大膽...沿途吹虛我激戰! 戰意未盡...返谷再三搜尋確認進攻......

＊＊＊

六月十七日

晚飯後與虫虫取得router, 日日落雨都無乜好做, 眼見《卡通》乍現, 濕地強勁, 心癢手痕...再激戰連場^^

＊＊＊

六月十八日

連續兩晚激戰, 攪到我發夢都出戰...有d抽根但心癢 =.=
攪醒虫虫...寶貝早晨全餐奉上!

原定計劃, 煑定飯仔等虫虫放工返到黎就開飯喇! 開始厭倦出街諗食乜, 呢期鍾意煑飯仔家庭樂~

臨訓前為左舊電無啦啦比虫虫鬧! 嬲你.\/.無聲炒飯! 虫虫出嗲功擺平!

＊＊＊

六月十九日

虫虫家族飯局, 以前飲酒要每次入紙申請, 家下我行為良好已經有通行證喇 Yeah~ (一副得戚樣)

＊＊＊

六月二十日

入(汽)油就不停升升升升升
入(石)油就不停跌跌跌跌跌

呀運呀呀運...你幾時返黎呀??

谷主又係時候沉澱下喇...

黑雨後的端午節

六月五日

今朝六點就比老闆噪醒左去做速遞員! 未訓醒又眼矇矇咁火速拎條鎖匙比老闆, 拎完條鎖匙準備返谷再訓過...都未返到就收到老闆電話話"吾該吾該真係吾該晒喇"...吓?! 我聽到覺得好怪羅! 洗吾洗呀-__-! 老闆又話都係博一博打比我, 睇下我會會肯肯咁快出到去乍...衆所周知我個朵叫雲吞架啦:p 二分鐘出門口係奇績黎架! 嘻~ 事實上我只係著左件風褸就出去喇, 上車落車根本就吾會嚇到人就無所謂啦 :p

唉! 其實晨咁早又落雨仆出去都無所謂, 最慘就係我返到谷訓吾返呀 >.< 磨到虫虫放工果陣就超眼訓! 不過又應承左煑好飯等虫虫一返黎就有得食, 就唯有頂硬上啦! 二條友撐枱腳兩送一湯白飯任裝~
食飽飽之後都無出街, 因為好大雨仲完全無停過添! 一路落到第二朝...

＊＊＊

六月七日

祝去左wet的老闆快快樂樂健健康康~

成晚都不停行雷閃電落大雨, 已經訓得麻麻地架啦! 九點幾又係比個電話噪醒起身收紅酒! 點解朝朝都噪醒我架 >_< 我又再一次訓吾返喇!

本來要中午同虫虫出西環執野裝新冷氣, 好彩我見咁大雨就叫虫虫打返去問下會會取消先啫, 得知原來西環水浸晒一街都係泥水! 再開電視睇, 都係紅雨姐...點解會咁浸法架?! 但原來頭先六點幾掛左黑雨, 周圍都浸得好利害, 香港路面幾乎癱瘓! 電視上睇到浸到上腰又有, 連的士都浸左半架死晒火, 有架私家車仲好似o係水入面飄飄下添-__-! 咁樣浸法...架車一定吾洗要都得喇! (但點解今朝有人可以咁早送到紅酒黎o幾??!!)
摸木摸木...好彩無盲舂舂出左去, 以史迪仔巴士o既高度...真係不敢想像 -.-

見到咁o既情形真係街都吾洗出, 就索性同虫虫大覺訓! 一訓就訓到四點, 起身之後得知大蛇一家大細今晚大駕光臨韓舍, 吸定塵洗定地迎接大細B啦梗係, 跟住就出街醫肚兼夾買定啤酒汽水薯片蝦條春卷仲有沙拉骨等今晚齊歡暢啦! 到夜晚十一點幾就出左尖咀接齊兩大一中兩細回谷開餐飲酒, 係就係夜左d...不過難得聽日個個都放假麻!
到最後, 個個都訓晒就淨返我同虫虫同細細個一齊煲碟食珍珠無核堤子, 心野o既細細個又為食喎^^木起個咀食到卜卜聲超可愛~ 食食下掃下佢個頭仔仲著埋添^^
都吾知有幾多年無同過BB一齊訓...感覺好得意! 不過我同虫虫都無得點訓, 吾係細細個扭計...而係粒人仔霸左半張床, 批手伸腳頂籮乜姿勢都有, 佢郁一郁我地就醒一醒, 望住佢個蠢蠢地o既樣真係好得意! 想當年...雪雪都係用個蠢蠢地眼濕濕o既樣氹左我帶佢返黎, 而虫虫亦都係春虫虫...我先"中招"乍~~

＊＊＊

六月八日

醒左之後虫虫就開始煑早餐比大家食, 食完之後兩個B就浸下浴玩下水, 本來諗住晏d去飲茶踩單車, 但有阻濟, 改左去會所食野再同bb玩左陣sir豬仔再去冒險樂園玩! 全程一中兩細玩到癲晒......

世事往往都係人算不如天算的! 為免令虫虫難做...o係送何小姐返歸做節、細細個又回家交豬的同時也送埋虫虫一程!! 同大蛇三口hea住等虫虫歸隊先再去打邊爐! 同大蛇盡情啤啤佢...清返剛才的悶氣!

二日一夜的食喝玩親子之旅告一段落~

＊＊＊

六月九日

今日訓到直至d手腳歸位先願起身! 出去食完個三合一下午茶再入沙田搵埋剛剛踩完單車的大蛇一家+姨媽媽再行街街! 可能落左幾日雨, 一到好天就個個都蒲晒出街, 到到都好多人呀! 無乜好行就唯有去食飯飯啦, 入到沙田就梗係食大圍強記雞粥啦! 再去食埋個康師傅甜品就滿足晒喇!
鬥快食粥粥贏左o既卓琳豬仲大開金口唱歌仔娛賓添, 希望個玩得好內斂o既卓妍豬快d識講野一齊唱就好喇! 仲有就係快d放膽d去踏出佢o既"第一步"就最好喇~

＊＊＊

六月十日

沉澱進行中.........